Nanenane ni ya wakulima,

 siyo Serikali

chui wa Tanzania

Tembo wa Tanzania

Siku ya leo hujulikana rasmi hapa nchini kama Siku ya Wakulima, maarufu kama Nanenane kutokana na kuadhimishwa tarehe nane mwezi wa nane kila mwaka. Kimsingi siku hiyo ni maalumu kwa wakulima.

Waasisi wa programu ya kuifanya siku hiyo iwe rasmi kwa wakulima walitaka wakulima watumie siku hiyo kama fursa ya kuonyesha mazao yao, kubadilishana mawazo miongoni mwao kuhusu kilimo na kutafuta namna ya kukabiliana na changamoto zinazowakabili kwa lengo la kuongeza tija na uzalishaji.

Pia maadhimisho hayo yalilenga kuwasaidia wakulima kufanya mashauriano kuhusu namna ya kupata masoko ya kuwapatia bei nzuri kwa mazao yao.

Masuala ya pembejeo za kilimo na mbinu za kufanikisha kilimo cha kisasa yalipewa kipaumbele siku hiyo, kwani wakati huo wataalamu wa kilimo na ‘mabwanashamba’ walikuwa sambamba na wakulima na viongozi wa vyama vya ushirika ili kuwapa ushauri katika maeneo husika.

Wakati huo wakulima walikuwa wakijiona kama wadau muhimu katika sekta ya kilimo na vyama vya ushirika vilikuwa vikiwajibika kwao kikamilifu, tofauti kabisa na hali ilivyo hivi sasa.

Inasikitisha kuona kwamba hivi sasa sio tu maadhimisho hayo hayawahusishi tena wakulima katika kiwango tulichokijua wakati ule, bali pia yametekwa na taasisi za Serikali, wanasiasa na wakala wa maendeleo wasiohusika na kilimo hata kidogo.

Kila wizara, mashirika ya umma na idara za Serikali zimejenga mabanda ya maonyesho kwa gharama kubwa ili kutumia siku hiyo kutangaza bidhaa na shughuli zake, nyingi zikiwa hazina uhusiano wowote na masuala ya kilimo, hivyo kuifanya Siku ya Wakulima kupoteza maana ya kuanzishwa kwake.

Shamrashamra za wakulima tulizokuwa tukizishuhudia siku hiyo zimepotea kutokana na viongozi wa Serikali na wanasiasa kuteka siku hiyo kwa sababu za kimasilahi.

Mkanganyiko kuhusu siku ya kilele cha maonyesho ya Siku ya Wakulima umetokana na kuwapo mkono wa Serikali katika maonyesho hayo ya wakulima.

Badala ya kukiachia Chama cha Wakulima Tanzania (Taso), kitekeleze jukumu lake la kuratibu maonyesho hayo, ikiwa ni pamoja na kuamua siku ya kilele cha maonyesho hayo kutokana na uwezekano wa kuingiliana na Sikukuu ya Iddi el Fitri, Serikali imepenyeza mkono wake na kuamua kwamba jana ndio iwe siku ya kilele cha maonyesho hayo. Matokeo yake ni mkanganyiko, kwani kanda nyingine, ikiwamo Mbeya zimeamua kilele hicho kiwe leo.

Katika siku za hivi karibuni zimejitokeza sauti kutoka sehemu mbalimbali hapa nchini zikitaka ifanyike tathmini juu ya ubora wa maonyesho hayo katika miaka 10 iliyopita ili kuona kama yamekuwa yakifanyika kulingana na malengo ya kuanzishwa kwake.

Moja ya sauti hizo ni ile ya Mkuu wa Mkoa wa Manyara, Erasto Mbwilo ambaye wakati akifungua maonyesho hayo Kanda ya Arusha, alisema tathmini hiyo itaonyesha kama yana faida au hasara na kuongeza kwamba huenda yakatumia gharama kubwa pasipo kuwasaidia wananchi.

Tunaungana na mkuu huyo wa Mkoa na wengine wengi ambao wameuliza maswali kuhusu ubora na umuhimu wa maonyesho hayo katika muktadha wa gharama kubwa zinazotumika kuyaendesha.

Kama tulivyosema hapo juu, kimsingi wakulima ndio walikuwa walengwa wakubwa wa maonyesho hayo, lakini sote tumeshuhudia Serikali na wanasiasa wakiyapa sura ya kibiashara, huku wakulima wakipigwa changa la macho.