NYUMBA YA AJABU ILIYOJENGWA KATIKATI YA MAKABURI

 

 

UJENZI WA NYUMBA MAKABURINI

 

NYUMBA YA AJABU ILIYOJENGWA 

KATIKATI YA MAKABURI YABOMOLEWA

WANANCHI mbalimbali mjini hapa wameendelea kujitokeza katika  eneo la makaburi ya Mtwivila  katika Manispaa ya  Iringa  kushuhudia ujenzi  wa  nyumba  inayojengwa katikati ya makaburi hayo na kusema kwamba tukio hilo ni la ajabu kwao.

Hata hivyo, wakati tunakwenda mitamboni, baadhi ya wafanyakazi wa Manispaa ya Iringa walikuwa njiani kwenda kuivunja nyumba hiyo huku wakazi wakiwa na wasiwasi kwamba huenda yakatokea maajabu makubwa.
Wakazi hao wanaoishi karibu na makaburi hayo wamesema kwamba hadi sasa hawajamshuhudia fundi anayejenga nyumba hiyo  zaidi ya kuona  ikiendelea kupanda juu.
Hata hivyo, wakazi hao wamesema iwapo uongozi wa mipango miji katika halmashauri yao utafumbia macho  suala hilo la ujenzi  holela, kasi  ya  wananchi kuvamia maeneo maalum itaendelea kuota  mizizi.
“Tunashangazwa na mwananchi  huyu  kuvamia eneo la makaburi  na kujenga  nyumba huku  viongozi   mbalimbali wa  serikali wakishiriki  shughuli za mazishi  eneo hili na kutazama ujenzi huu bila ya kuchukua hatua yoyote,” alisema mkazi mmoja aitwaye Saimon Mwapakata.
Wakazi hao wamesema kwamba nyumba hiyo inajengwa ikiwa imezungukwa na makaburi na itawapo itakamilika wakazi wake watalazimika kufanya shughuli zao, kujipumzisha au kupunga upepo juu ya makaburi.